الكرامه فى الحب

موضوع: الكرامه فى الحب أبريل 28th 2008, 3:04 am

الكرامة في الحب
سلك مكشوف.. يا إما يكهربك يا إما يخليك تنوّر

الكرامة..
هي ذلك الشيء الذي يقبع في مؤخرة رأسك وتتحسسه بقلبك، وعندما يصاب بسوء..
ذلك الشيء مش قلبك.. ترتدي خوذة هولاكو وتطير فوق صهوة جواد أحمد السقا في
فيلم شورت وفانلة وكاب.. أيوه فيه لقطة على البحر بيجيب فيها حصان مش عارف
منين!!.. لكي تحارب العالم كله أملاً في أن تحميها
الخلاف على وجود
الكرامة في الحب من عدمه هو خلاف تاريخي.. خلاف البشر على أزليّة البيضة
والفرخة.. هو مين قبل مين صحيح؟.. ولا يمكن بأي حال من الأحوال أن تستدلّ
على رأي قاطع وصارم في هذه القضية.. فالبيضة هي الأول؛ لأنها فقست
الكتكوت، والكتكوت بقى فرخة وهكذا، وبلاش كلام كتير بقى في موضوع الفراخ
ده أحسن البلدية بتلمّ الكل اليومين دول، وخلينا في موضوعنا
*******
الأول
بس قبل ما ندخل في المعمعة.. لازم نفرّق بين موضوعنا وبين الكرامة
المرتبطة بالخيانة الأخلاقية فعلاً وقولاً، دي قصة ودي قصة تانية خالص مش
مجالها هنا، وكلامنا كله هيكون عن الكرامة المرتبطة في الأساس بتصرفات
وأفعال وأقوال من النوعية المستخدمة بشكل يومي في حياتنا، يعني مثلا زي
مريم اللي قالت لجوزها سليط بعد أسبوعين بس من جوازهم قدام مامته وأخته
وهي بتهزر: "سبيط" ياحبيبي نفسي آكل جمبري
فما كان من سليط إلا أن رفع
يده والباقي.. إنتم عارفينه، فتعقّد الأمر، واتهم كل طرف الآخر بإهانته
أمام العائلة.. ولولا أصحاب القلوب الرحيمة، كان الطرفان سيفترقان إلى
الأبد
كمان مش هنستبعد تماماً مرادف كلمة الكرامة المرتبط عند البعض
وخاصة البنات بتنازلات أخلاقية من نوعية: حبّيته، فسلّمت له نفسي..
وكرامتي.. على أساس إننا هنتجوز بعد 8 سنين
مفيش
حاجة من دي خالص، الشرف ليس له مرادف إلا نفسه، وهو غير قابل للوضع في أي
ميزان، هو وحده ميزان ومؤشر لأشياء أخرى.. اتفقنا على كده؟ لأ.. طيب كويس
جدّاً.. نروح بقى للسؤال المهم
هو فيه كرامة في الحب فعلاً؟
القصة
دي تحديداً فيها ثلاثة اتجاهات واضحة وصريحة، واحد منهم مفتكس جديد حبتين
واثنين معروفين، الاثنين المعروفين واحد فيهم.. ها.. توهت ولا لسه؟.. ممكن
نقول عليه اتجاه عنتري بتاع الناس اللي قلبهم جامد حبتين، والتاني اتجاه
مفلسف شوية، لكنه خليط ومزيج لطيف من الاتجاهات اللي قبله
[size=25]*******[/size]

الكرامة زي السوسة في الأسنان
محتاجة "سيجنال تووو" على طول.. حب يعني
الأصل
في الحب الحقيقي.. عند البعض.. إن مفيش كرامة، ببساطة الحب نفسه كمضمون،
وليس كمسمّى سطحي هو بديل للكرامة، فأينما وجد بصدق وعمق كافٍ بين أي
طرفين انسحبت الكرامة إلى أقصى أركان العقل والعاطفة؛ لتظل كامنة هناك،
ومع نمو الحب تتباعد المسافات، ولا تجد لنفسها مكاناً، فالطبيعي أن الحب
يصاحبه احترام ووفاء وإخلاص وودّ واهتمام، وكلها أسماء مختلفة في شكلها
لكنها متوحدة مع لفظ ومعنى الكرامة، ولكن مع انتفاء الحب تتعاظم قوة
الكرامة، وتبدأ في الطفو على السطح
بالبلدي كده، الكرامة في أي علاقة
حب صادق لا وجود لها، لكنها تصبح ضيفاً خفياً وخبيثاً عندما تبدأ الخلافات
والنزاعات تدبّ في العلاقة، فهي تفترش التراب ولا تأكل ولا تنام؛ لأن أحدا
لا يعتني بها في العلاقة الحقيقية، لكنها سرعان ما تصبح وحشاً كاسراً
بأنياب غليظة وقتما يسحب الحب عزاله، ويقرر هجران العلاقة إلى الأبد
فيه
إعلان بتاع معجون أسنان بيشرح قصة حياة السوسة اللي شكلها أخضر وبتهاجم
طبقة المينا.. ما تخبيش وشك ما تخافش.. لما سعادتك تنسى تغسل أسنانك بعد
الأكل.. فاكره؟ لأ؟..! طيب كويس قوي برضه، الإعلان ده بيشرح بالظبط حدوتة
الكرامة في الحب، فالسيجنال توو.. اللي هو الحب يعني.. يقضي دائماً على أي
محاولات لوجود السوس.. اللي هو الكرامة.. وبالعكس تماماً يكون القياس؛
بمعنى أنك لما تبطّل تستعمل (سيجنال تو) تبدأ الأسنان في التسوس، حتى
تتآكل تماماً، وكذلك يكون الحال عندما يرفع الحب يده عن أية علاقة حتى
تتفاقم مشكلة الكرامة
باختصار الاتجاه ده جديد شوية، معاصر حبتين، وإلى
حد ما بيعكس مدى تطور علاقة الحب بين الزوجين في الألفية الجديدة، وخليك
معايا كويس؛ لأن حتى فترة ما قبل الزواج طريقة التفكير بالشكل ده
وبالكيفية دي شبه مستحيلة، وده مش بالإرادة يعني، لأ هو ما ينفعش؛ لأن بكل
صراحة ووضوح الكيانات هنا ما زالت منفصلة ولم تتوحد، مهما قلت ومهما وصفت
في وصولك مع طرفك الثاني إلى أسمى طبقات الحب، في لحظة، بل وأقل من لحظة،
كل شيء قد يذهب من شباك العربية، زي ما بترمي كيس الشيبسي الفاضي
[size=25]*******[/size]

الكرامة فوق كل اعتبار
لما تحبي تكلميني تقولي لي: يا أستاذ حسين، أو: يا سيد حسين
فيه
ناس الحب عندها كيان مستقل بكل ما فيه.. من مشاعر وأفكار وهواجس وأحلام
وأمنيات.. عن الكرامة الشخصية، يعني أحبك آه، تيجي عليّ.. عمداً أو بدون
قصد.. لأ.. كل واحد من طريق
قد يبدو أنصار أصحاب هذا الاتجاه.. وما
أكثرهم.. وكأنهم مصابون بجمودية القلب والمشاعر، وليس لديهم أي استعداد
للتضحية والتحمل قليلا من أجل حبهم، لكن الفكرة ببساطة شديدة أنهم بالغوا
كثيراً في الاعتداد بأنفسهم وبالغوا أكثر وأكثر في مفهوم ومعنى عزة النفس
لديهم، فباتت مرادفاً يناطح الكرامة، ويعلوها في بعض الأحيان.. على حسب
الحالة المزاجية.. فباتت كل كلمة أو فعل على بساطته أو قوته يحدث شرخاً ما
في جدار تلك العلاقة؛ ليخرج في النهاية وحش الكرامة بكامل هيئته السيئة..
زي السوسة الخضرا.. ليدافع عن نفسه وينسف ويدمر ويحطم كل شيء أمامه
الأمثلة
التاريخية على هذه النوعية من العلاقات جسّدتها الدراما المصرية في
مسلسلات وأفلام قديمة وحديثة، فذلك الحوار الكوميدي لـصلاح ذو الفقار أمام
زوجته شادية عندما كان يحدثها في المصلحة أمام الموظفين ما زال خالداً في
الذاكرة، وإلى حد ما يعكس ما نقول
هي: مين اللي إدى العمال إجازة؟
هو: أنا اللي إديت للعمال إجازة
هي: مخصوم منك.. تسكت، ثم تنظر بضعف، وترتخي أحبالها الصوتية.. ليه يا حسين عملت كده؟
هو: أولاً لما تحبّي تكلميني تقولي لي: يا أستاذ حسين أو: يا سيد حسين، ثانيا: إدّيت العمال إجازة؛ لأني كنت شايف إنهم تعبوا
هي: هيرتاحوا بعد ما نخلّص المشروع
هو: بس أنا شايف إنهم يرتاحوا دلوقت
هي: يعني مش عاوز تعترف بغلطك
هو: لأ
هي: مخصوم منك 3 أيام
ويعود حسين؛ ليثأر لكرامته في المنزل.. فيحتدّ عليها، وتهرب من أمامه؛ لتجهز الطعام.. ثم
هو: كل يوم قلقاس؟.. كل يوم قلقاس؟
هي: ده مش قلقاس يا حبيبي، دي مكرونة بالفراخ
هو: كل يوم فراخ؟.. كل يوم فراخ؟.. دي عيشة تقرف
أصحاب
هذا المبدأ أو الاتجاه يحملقون بعصبية زائدة وحساسية مفرطة في كل كلمة أو
فعل، ومبررهم في ذلك أن كرامتهم لا يمكن أن تمس، وخاصة من أقرب الناس
إليهم، وهم بالمناسبة لا يفرقون بين أن يكون هذا الفعل أو القول أمام
الناس أو في الخفاء، عموماً اللي بيفكروا بالشكل ده، ليسوا أشراراً ولا
متذئبين يتحولون وقت اكتمال القمر بدراً.. بل بالعكس قد تجدهم طيبين
للغاية، لكن تركيبتهم الشخصية تكونت بهذا الشكل وبهذا الأسلوب، فبات من
الصعب تغييرها، فالثابت لديهم أن كفّة الكرامة ترجح دائماً عندما يوضع
مقابلها الحب
[size=25]*******[/size]

الحب الحقيقي هو
اللي يصون كرامة الحبيب ولا يمسها
الكرامة هنا سلك مكشوف بجد اوعى تتكهرب
الاتجاه
ده تقدر تقول عليه مفلسف شوية، لكنه يعد مزيجاً لطيفاً من الاتجاهين
السابقين، فالحب هنا ليس عكس الكرامة.. زي الاتجاه الأول.. وفي نفس الأمر
ليس في كفة والحب في كفة.. زي الاتجاه الثاني.. لأ.. الاثنين حاجة واحدة
متطابقة، آه فيه كرامة عند كل طرف، لكنها غير مؤذية
ببساطة شديدة..
وتجنباً لأي خلط.. في هذا الاتجاه دور الحب مختلف، بمعنى أنه لا يحلّ محل
الكرامة.. لأنها موجودة بشدة.. وأيضا ليس أقل وظيفة من الكرامة؛ لأنه هو
الذي يرعاها لذلك فهو مهم نفس أهميتها
ولكن رغم ذلك يبقى سؤال مهم
ماذا لو لم يراعِ أحد الطرفين سلك الكرامة وتعدّى عليه؟
لأ..
بخلاف إنه هيتكهرب، العلاقة هنا قد تصل إلى مفترق الطرق، وقد تلتهب
الأمور.. يعني نار وكهربا.. وفي الحالة دي لازم المطافي والإسعاف تتدخل
بقوة وفي الوقت المناسب.. اوعى تستخدم الميه.. لو طفت النار هتنشفك من
الصاعقة.. والإسعاف والمطافي هنا هي الحب وعلاقة المودة والاحترام
المتبادل والتي تعيد العلاقة إلى بدايتها مرة أخرى

*******
رغم
كل ما سبق، الكرامة كأية قيمة إنسانية غير مرئية.. لأنها محسوسة.. تعتبر
شيئاً نسبيّاً للغاية، فهي كأي مسمّى يختلف معناها من فرد إلى آخر وفق
متغيرات كثيرة كالبيئة والتعليم والثقافة والنشأة والحالة الاقتصادية وغير
ذلك، لذلك فمدلول الكرامة عند سليط قد يختلف بالتأكيد عن مدلول الكرامة
لدى مرجان ده الكيلو بـ 20 جنيه، وده بـ 9.30
[size=25]*******

[/size]للامانه منقول

موضوع: رد: الكرامه فى الحب أبريل 28th 2008, 3:36 am

الكرامة زي السوسة في الأسنان
محتاجة "سيجنال تووو" على طول.. حب يعني

الحب الحقيقي هو
اللي يصون كرامة الحبيب ولا يمسها
الكرامة هنا سلك مكشوف بجد اوعى تتكهرب

اية الجمال دا يا يويا يا قمر
توبيك هايل

بس فى حاجة الفرخة قبل البيضة لا لو البيضة الاول طب جت منين
لازم تكون فى فرخة هى الى بضيتها
ولااية متفتح معاية امال

موضوع: رد: الكرامه فى الحب أبريل 28th 2008, 3:39 am

ميرسى يا حماده على ردك
الجميل ده

لا مفتح معاك والله
ولو الفرخه يبقى جت منين
المفروض كانت كتكوت وفبلها كانت فى البيضه
فتح معايا انت يا عم احمد

ميرسى يا جميل

موضوع: رد: الكرامه فى الحب أبريل 28th 2008, 3:43 am

هههههههههههههههههههه
بغض النظر عن حصان احمد السقا
والاتجاه العنترى والكلام دا

انا كرمتى عندى قبل الحب

الحب الحقيقي هو
اللي يصون كرامة الحبيب ولا يمسها

الانسانه اللى كنت مرتبط بيها وانفصلنا كان السبب كرامتى

هو الواحد ايه غير حبه كرامه وشويه حاجات فوق بعض

موضوع: رد: الكرامه فى الحب أبريل 28th 2008, 3:49 am

لا والبيضة جت منين يعنى
اشتروها من عند عم متولى
كان فى فرخة الاول لازم
وبلاش واضح اكتر من كدة

موضوع: رد: الكرامه فى الحب أبريل 28th 2008, 7:29 am

انتو قلبتو التوبيك عشة فراخ كدا ليه
احنا قربنا نكاكي خلاص

ههههههههههههههههههههههههههههههههههه

توبيك تحفه يايويو بس يعني لو الاتنين بيحبو بعض بجد كل واحد فيهم اكيد هيحافظ على كرامة التاني ومش هيعرض التاني لموقف تتهان فيه كرامته .

موضوع: رد: الكرامه فى الحب أبريل 29th 2008, 12:51 am

sendbad كتب:: هههههههههههههههههههه
بغض النظر عن حصان احمد السقا
والاتجاه العنترى والكلام دا

انا كرمتى عندى قبل الحب

الحب الحقيقي هو
اللي يصون كرامة الحبيب ولا يمسها

الانسانه اللى كنت مرتبط بيها وانفصلنا كان السبب كرامتى

هو الواحد ايه غير حبه كرامه وشويه حاجات فوق بعض

سيبك اكيد مامتها داعيالها
ههههههههههههههههههههه
واللى بيحب حد هيعتبره كرامه حبيبه من كرامته
وربنا يوفقك يا يوسف
وتلاقى اللى مامتها داعيه عليها كده
هههههههههههههههههههه
ميرسى على ردك الجميل

موضوع: رد: الكرامه فى الحب أبريل 29th 2008, 12:57 am

fly_love كتب:: لا والبيضة جت منين يعنى
اشتروها من عند عم متولى
كان فى فرخة الاول لازم
وبلاش واضح اكتر من كدة

لا ممكن عم حسين اللى جمبه
ههههههههههه
هيه وجهه نظر بردوا
وانا اقتنعت بيها
بس قول كده بقى للناس التانيين
اللى بيقولوا كده
ميرسى يا احمد

موضوع: رد: الكرامه فى الحب أبريل 29th 2008, 12:59 am

nano14 كتب:: انتو قلبتو التوبيك عشة فراخ كدا ليه
احنا قربنا نكاكي خلاص

ههههههههههههههههههههههههههههههههههه

توبيك تحفه يايويو بس يعني لو الاتنين بيحبو بعض بجد كل واحد فيهم اكيد هيحافظ على كرامة التاني ومش هيعرض التاني لموقف تتهان فيه كرامته .

هههههههههههههههههههههه
هش هش
قومى يا بت يا نانو امسكى الفرخه اللى جريت هناك دى
هههههههههههههههههه
ونان مغاكى لو حبهم بجد هيحافظوا على كرامه بعض
لان ساعتها هيكونوا واحد

موضوع: رد: الكرامه فى الحب أبريل 29th 2008, 10:37 pm

كرامة الانسان قد تعيش فى ظل الحب الحقيقى لمحاولة كل طرف فى المحافظه على كرامة الاخر ...اما عند وجود علاقة مبتدعه تحت مسمى الحب فمن الصعب بقاء الكرامة على قيد الحياه ... وقد يكون حفاظ الشخص على كرمته بشكل زائد عن حده (كرامته بتنئح عليه) سبب رئيسى واساسى فى فشل اى علاقه حتى مهما كانت درجة قوتها ....

موضوع جميل يا ايوش ..... صحيح : الفرخه هى الاول ما ربنا خلقها وبعدين هى باضت .. مش معقول هتتخلق بيضه كده مع نفسيها .. طب مين هيرقد عليها عشان تفقس .... هو اتخلق فرخه ومعاها اكيد ديك الى هو جوزها

موضوع: رد: الكرامه فى الحب أبريل 30th 2008, 4:14 am

zam&aiai&alek كتب:

nano14 كتب:: انتو قلبتو التوبيك عشة فراخ كدا ليه
احنا قربنا نكاكي خلاص

ههههههههههههههههههههههههههههههههههه

توبيك تحفه يايويو بس يعني لو الاتنين بيحبو بعض بجد كل واحد فيهم اكيد هيحافظ على كرامة التاني ومش هيعرض التاني لموقف تتهان فيه كرامته .

هههههههههههههههههههههه
هش هش
قومى يا بت يا نانو امسكى الفرخه اللى جريت هناك دى
هههههههههههههههههه
ونان مغاكى لو حبهم بجد هيحافظوا على كرامه بعض
لان ساعتها هيكونوا واحد

بيتك بيتك بيتك

حلقي يايويو

ههههههههههههههههههههه

موضوع: رد: الكرامه فى الحب أبريل 30th 2008, 4:16 am

انا مع راي كتكوت الحقيقه

كلامه مقنع

هههههههههههههههههههههههههههه

موضوع: رد: الكرامه فى الحب أبريل 30th 2008, 9:17 am

شكرا يا ايه

توبيك جميل

موضوع: رد: الكرامه فى الحب مايو 2nd 2008, 1:31 am

ميرسى شا شريف على ردك الجميل

وميرسى يا احمد(كتكوت)
على ردك وخلاص احمد فلاى لاف
اقنعنى برايه اللى هو رايك بردوا

وميرسى يا نانو يا عسل